Бібліятэкі Капыльскага раёна далучыліся да праекта «Кожная пятніца – роднае, сваё». 23 студеня 2026 года ў бібліятэчных установах праходзіць цікавая акцыя «Чытаем і размаўляем на роднай мове». Яе мэта – вярнуць жывую беларускую мову ў штодзённае спажыванне, нагадаць аб прыгажосці і багацці роднага слова, а таксама падтрымаць цікавасць да літаратурнай спадчыны краю.
Акцыя не абмяжоўваецца адной тэматычнай сустрэчай. На працягу ўсяго часу яе правядзення ў бібліятэках арганізаваны спецыяльныя кніжныя выставы. На іх прадстаўлены не толькі класікі беларускай літаратуры, але і сучасныя аўтары, чые творы цікавяць і маладое пакаленне. Асобныя радзелы прысвечаны краязнаўчай літаратуры, каб кожны мог паглыбіцца ў гісторыю і культуру роднага Капыльскага раёна.
Аднак, галоўнай «жывой» часткай акцыі сталі аглядныя экскурсы і гутаркі. Бібліятэкары праводзяць для наведвальнікаў – і дарослых, і дзяцей – цікавыя агляды прадстаўленых выставак, распавядаюць пра лёсы пісьменнікаў, чые кнігі стаяць на паліцах, чытаюць урыўкі твораў. Атмасфера спрыяе непасрэднаму дыялогу: наведвальнікі дзеляцца ўласнымі любімымі радками, успамінаюць, якія творы вывучалі ў школе, просяць парады, што пачытаць дома.
Капыльская раённая бібліятэка імя А.Астрэйкі прапануе выставу-знаемства «Чытаем роднае» і выставу «Капыльшчына літаратурная». Кожны удзельнік акцыі ў падарунак атрымлівае закладкі серыі «Літаратурнае сузор’е Капыльшчыны».
У рамках акцыі праходзяць мерапрыемствы, прысвечаныя юбілейным датам беларускіх пісьменнікаў. Так, бібліятэкары Капыльскай дзіцячай бібліятэкі правялі агляд творчасці «Святло дабрыні», прысвечаны 75-годдзю з дня нараджэння М.Пазнякова. У Браткаўскай сельскай бібліятэцы-клубе арганізавана выстава-сустрэча «Збіральнік залатога зерня слова» да 80-годдзя А.Марціновіча.
«Размаўляем і чытаем па-беларуску» — менавіта пад такім цёплым і натхняльным дэвізам бібліятэкары Цімкавіцкай сельскай бібліятэкі правялі моўна-літаратурны занятак для вучняў 2–3 класаў Цімкавіцкай сярэдняй школы. Дзеці з задавальненнем віталіся па-беларуску, гулялі ў моўныя гульні, адгадвалі загадкі, чыталі ўслых і знаёміліся з вершамі беларускіх класікаў — Максіма Багдановіча, Янкі Купалы, Рыгора Барадуліна, Уладзіміра Караткевіча. Асабліва жывой атрымалася гульня «Пахвалі сябра», якая напоўніла сустрэчу шчырасцю і добрым настроем.
Такія заняткі дапамагаюць дзецям адчуць прыгажосць роднай мовы, развіваюць маўленне і любоў да кнігі.
Акцыя «Чытаем і размаўляем на роднай мове» – гэта добрая нагода для кожнага жыхара Капыльшчыны адчуць асабістую сувязь з беларускім словам, адкрыць для сябе новыя імёны або з прыемнасцю зноў успомніць любімых беларускіх аўтараў. Бо родная мова – гэта не толькі звычка, гэта душа народа, якая захоўваецца на старонках кніг і ў штодзённай шчырай гутарцы.
Прыходзьце ў бібліятэкі Капыльскага раёна, каб пачуць, убачыць і пагаварыць на мове, што нам дасталася ад продкаў.
Аддзел маркетынгу, сацыякультурнай дзейнасці і метадычнай работы
