Напрыканцы сакавіка 2025 года прадстаўнікі Пісьменніцкага клуба «Літаратурны экватар» завіталі ў Капыльскую раённую бібліятэку імя Анатоля Астрэйкі. У чытальнай зале бібліятэкі адбылася творчая сустрэча «экватарцаў» з Капыльскім літаратурным аб’яднаннем «Вясёлка».
Адкрыла мерапрыемства загадчыца бібліятэкі Алена Пілат. Далей слова перайшло да кіраўніка «Літэкватара», пісьменніка і журналіста Вячаслава Корбута. Кіраўнік клуба распавёў пра «экватарыяльную» суполку і альманах «Літаратурны экватар». Таксама Вячаслаў прадставіў сабраўшымся прыехаўшых выступоўцаў. Пісьменніца, журналістка, шэф-рэдактар альманаха «Літаратурны экватар» Інга Вінарская, чытала пераклады сваіх рускамоўных вершаў на беларускую мову з кнігі «Гучы, маё сэрца, гучы…». Паэтка, аўтар-выканаўца ўласных песень, сябра Беларускага саюза музычных дзеячоў Святлана Войтава і вершы свае чытала, і песні спявала. У выкананні Вячаслава Корбута і паэта, празаіка, драматурга Глеба Ганчарова прагучалі лепшыя творы аўтараў.
З боку Капыльскага літаб’яднання «Вясёлка» выступілі: паэт-песеннік Мікалай Майсюк; прафесар, доктар навук, палкоўнік у адстаўцы Міхаіл Клішэвіч; дзіцячая пісьменніца Любоў Мотус.
Кніжнаму фонду Капыльскай раённай бібліятэкі прыехаўшымі з Мінска аўтарамі былі падараваныя некалькі экзэмпляраў альманаха «Літаратурны экватар», а таксама экзэмпляры ўласных кніг з аўтографамі.
Завяршылася мерапрыемства агульнай фотасесіяй і чаяваннем з Капыльскімі салодкімі прысмакамі ў адной з залаў бібліятэкі.
